Të paktën katër civilë kanë humbur jetën nga bombardimet e avionëve rusë në vendbanimet në pjesën rurale perëndimore të provincës së Halepit që janë të inkuadruara brenda zonës së deeskalimit të Idlibit në veriperëndim të Sirisë, ku aktet e agresionit janë të ndaluara sipas një marrëveshjeje ruso-turke, raporton Anadolu Agency (AA).

Sipas observatorit ajror të opozitës, avionët rusë në orët e natës kanë kryer sulme ajrore në rrethin Daret Izze, dhe në zonat Hute, Sellum dhe Bala.

Sipas agjencisë lokale të mbrojtjes civile, e njohur si Helmetat e Bardha, katër civilë kanë humbur jetën në Bala, përfshirë dy fëmijë.

Agresioni i fundit në zonën e deeskalimit në Idlib ka shkaktuar që qindra mijëra civilë të zhvendosen drejt kufirit me Turqinë.

Situata në Idlib

Gjatë takimit të Turqisë, Rusisë dhe Iranit në maj të vitit 2017 në Astana të Kazakistanit, Idlibi u shpall zonë e deeskalimit, duke përfshirë edhe disa rajone përreth, ku aktet e agresionit do të ndaloheshin.

Turqia dhe Rusia arritën një marrëveshje shtesë në shtator të vitit të kaluar në Soçi si pasojë e shkeljes së armëpushimit nga ana e regjimit sirian.

Megjithatë, forcat e regjimit me ndihmën e mbështetësve i kanë vazhduar sulmet e tyre pavarësisht marrëveshjes. Që nga ajo datë, mbi 1.600 civilë kanë humbur jetën si pasojë e sulmeve.

Rusia, regjimi dhe terroristët që i mbështesin që shënjestrojnë Idlibin, vetëm që nga fillimi i vitit 2019 kanë shkaktuar migrimin e rreth 1.300.000 civilëve në afërsi të kufirit me Turqinë.